لو فاكر إنك حتسقط مرسي 30-6 و بعدها البلد حتهدأ تبقي ساذج ... ركز معايا :
عندك الثوار نازلين و عارفين أن بتوع " آسفين يا ريس " نازلين معاهم , بس عاملين مش واخدين بالهم لأنهم محتاجين حشد ...و عايزين يسقطوا النظام و بعدها ناويين يحاكموا مبارك محاكمات ثورية .
و بتوع آسفين يا ريس حيبقوا مش طايقين الثوار اللى نازلين معاهم ...بس حيعصروا ليمونه و يستغلوهم علشان يطلعوا مبارك و يرجعوا نظامة و هم واثقين أن النظام العائد حيلم الثوار كلهم فى المعتقلات .
طيب عندك جبهه الإنقاذ دلوقتى بيؤكدوا أنهم حيتوافقوا على من يصبح رئيسا بعد مرسي ... لكن الواقع أن البوب بياخد حمدين على أد عقله و مطمن أن وراه أمريكا حتقوم بالواجب و حيبقي رئيس ... و حمدين بيهاود البوب و وقت الجد حيلعب على أنه واحد مننا و البوب نمساوى !
أما بتوع تمرد فقاعدين هم و جبهه الإنقاذ يغنوا و يردوا على بعض ... الجبهه تقول لهم أنتوا اللى حتقودوا الموقف منذ 30-6 ... و تمرد تقول لأ و الله ما يحصل أنتوا الكبار و إحنا معاكم ... و طبعا مفهوم أن تمرد محتاجه الدعم المادى و السياسي ...و مع نهاية التظاهرات و إغلاق حنفية التمويل وقتها حنسمع سيمفونيات ردح حول من قام بترتيبات 30-6 .
ده غير الفلول و من وراؤهم من أجهزه الدوله العميقه اللى حينزلوا و براءة الأطفال فى عينيهم يطالبوا بحق الشهداء , و هم فى الواقع بياخدوا صور للمتظاهرين علشان يتعاملوا معاهم بعدين .
يعنى الخلاصة , اللى يقولك لازم مرسي يمشى يا إما حيبقي فى حرب أهلية , قول لة أن الحرب الحقيقية لن تبدأ إلا لو سقط مرسي ... لما كل واحد من دول يحاول تحقيق الأهداف التى ثار من أجلها .
موضوع: لو فاكر إنك حتسقط مرسي 